Ce document est extrait du site Haisoratra : http://www.haisoratra.org/article.php3?id_article=718
mise en ligne le dimanche 11 février 2007 par Nary

Rubrique : Ireo mpanoratra ankehitriny / Ecrivains en ligne > Tononkalo / Poésie > Fredy JAOFERA

Ao mitady fahoriana,
ao mitady fiadanana ;
ao no mahazo fijaliana,
ao no mahazo fihavanana.

Ao mitady fandravana,
ao mitady fanorenana ;
ao no very mihanahana,
ao no ravo be fonenana.

Ao mitady herisetra,
ao mitady zava-tsoa ;
ao no ory tsisy fetra,
ao no tretrika tokoa.

Ao mitady ranomaso,
ao mitady fahendrena ;
ao no lavo be ankaso,
ao no mahazo fandresena.

Fredy JAOFERA